Bündner Kunstmuseum Chur
Museum d’art dal Grischun Cuira
Museo d’arte dei Grigioni Coira

Prevista

Lise Gujer
24-08—17-11-2024​

L'onn 1922 chatta Lisa Gujer in vegl taler en ina chasa ch'ella ha prendì en locaziun. Uschia cumenza ella a rimnar experientschas da taisser e fa cuvertas da maisa. Il medem onn emprenda ella ad enconuscher Ernst Ludwig Kirchner en il ravugl d'amis da Tavau ch'èn interessads culturalmain. Ella fa sias emprimas emprovas da producir tapissarias tenor ils dissegns da Kirchner. I sa sviluppa uschia ina stretga collavuraziun tranter els dus. Cun paucas interrupziuns dura questa collavuraziun fin il suicidi da Kirchner l'onn 1938. En la collavuraziun directa cun Kirchner sa mussa Lise Gujer sco partenaria da discussiun ideala. Cun mobiglias ed ovras da l'artist endrizza ella suenter la mort da Kirchner «in lieu commemorativ per Ernst Ludwig Kirchner» en ina chasa ch'ella aveva cumprà en la Val Sertig. Il cumenzament dals onns 1950 renascha l'interess per la vasta collecziun d'ovras da Lise Gujer tenor ils dissegns da Kirchner, e Lise Gujer cumenza danovamain a producir tapissarias tenor ils models originals che l'èn restads. I cumenza in'activitad che dura passa 10 onns, ch'è curunada da success e d'ina dumonda pli e pli gronda per sias ovras. L'exposiziun en il Museum d'art dal Grischun che vegn sviluppada en stretga collavuraziun cun il Museum Brücke a Berlin, raquinta l'istorgia da la vita e da la lavur da Lise Gujer ord la perspectiva da l'artista da textilias, che percepescha congenialmain las ideas dad Ernst Ludwig Kirchner e che cuntinuescha cun quellas en moda independenta suenter la mort da l'artist. Ultra da las differentas versiuns da las singulas ovras mussa l'exposiziun las lavurs preparatoricas singularas che permettan in sguard differenzià sin la collavuraziun da Gujer e Kirchner. Numerus documents e maletgs dilucideschan plinavant il spiert artistic che ha dà la tempra a questa lavur. Suenter la preschentaziun a Cuira vegn l'exposiziun mussada en il Brückemuseum a Berlin.
Uras d'averturaMa-Du 10.00–17.00 Gi 10.00 – 20.00