L'expressiunissem dat en il museum d'art dal Grischun in accent extraordinari a la collecziun. La figura centrala è Ernst Ludwig Kirchner che ha vivì a Tavau ils onns 1917 – 1938. Ils emprims onns a Tavau ha el manà in dialog intensiv artistic ed uman cun artists pli giuvens. Ultra dal Tudestg Philipp Bauknecht e dal Ollandais Jan Wiegers, ils quals èn vegnids en il Grischun sco Kirchner per motivs da sanadad, eran quai ils commembers fundaturs da la gruppa d'artists da Basilea "Rot-Blau" Hermann Scherer, Albert Müller e Paul Camenisch. Els èn stads a Tavau per in temp pli lung, suenter ch'els han scuntrà il zercladur 1923 l'art da Kirchner en la chasa d'art a Basilea.

Ils artists da l'expressiunissem refusan las convenziuns academicas e stiman la pictura al liber sco er la transfurmaziun directa d'experientschas fatgas cun la glisch, cun colurs e cun sentiments. Sentiments subjectivs, penellada individuala, paucas colurs e furmas èn elements per exprimer emoziuns. Acts en la natira ed en il moviment liber èn motivs ch'expriman las experientschas internas cun il mund. In impuls impurtant han els chattà en la confruntaziun cun l'art dals pievels primitivs.