Il spazi da viver dal Grischun, caracterisà da la forza da la natira, stat en il center da «La bova sco preparat». Partind da la bova da Flem sa tschenta la dumonda, co ch'in tal eveniment ch'è gia daditg passà po vegnir rendì visibel oz e co ch'in moviment talmain andetg po vegnir conservà. L'exposiziun stat en connex cun il project dal fond naziunal cun il medem num da la scola auta d'art a Berna e reunescha lavurs da 16 artistas ed artists.

In team da perscrutaziun cun l'istoricra scientifica Priska Gisler ed ils artists Florian Dombois, Schirin Kretschmann e Markus Schwander è sa fatschentà cun l'incumbensa da s'avischinar teoreticamain ed artisticamain a la bova da Flem. L'instrumentari per questa confruntaziun furma il preparat, ina tecnica ch'è enconuschenta en las scienzas natiralas per scuvrir, per preparar e per conservar in object specific. Spezial vi dal preparat è il material. Cuntrari ad in model sa cumpona il preparat adina da la medema materia sco il fenomen che duai vegnir preschentà. Co rabaglian ins ussa la bova en il museum?

Ultra da las audioinstallaziuns novas e da las intervenziuns spazialas da Dombois, Kretschmann e Schwander vegnan mussadas tschertas posiziuns oravant tut d'artistas e d'artists contemporans, che sviluppan strategias da far preparats u ch'examineschan il crudar dal grip. Centrala è la cuntradicziun da vulair fixar moviments. Tras la nova installaziun da Roman Signer che sa numna "crudada da crappa" n'audan ins betg mo la forza da crappa crudanta, mabain vesan ins er la forza sculpturala e figurativa d'in tal eveniment. Ils crappuns da Gereon Lepper roteschan en in cilinder en in ciclus perpeten tranter stagnaziun e distatga. Tuttas duas lavurs renvieschan exemplaricamain als mecanissems da la bova, ma s'avischinan a la noziun dal preparat, duvrond crappa reala cun sias caracteristicas acusticas, olfactoricas e fisicalas. Katja Schenker ed Esther Mathis creeschan d'ina vart connexs anc pli clers cun il preparat geologic, da l'autra vart neutraliseschan ellas a medem temp quels.

Er sche l'acribia sistematica dals preparats da la surfatscha da la terra da Mark Boyle u il cul dal grip negativ che renviescha al lieu da distatga da Dominik Zehnder sa basan sin ina pratica da las scienzas natiralas, porscha l'art per gronda part parallelas metaforicas ed enconuschientschas betg linguisticas concernent il material e sias caracteristicas. Quest project tematisescha conscientamain l'interfatscha tranter l'art e la scienza, perscrutaders scientifics e geologs vegnan integrads en la discussiun, perquai ch'ils dus champs tematics èn gia adina stads colliads in cun l'auter. La collecziun da las scienzas natiralas e la collecziun d'art èn stadas reunidas durant lung temp sut il medem tetg en il museum da Cuira. Ultra da quai hai gia dà l'onn 2009 in'emprima exposiziun da caracter interdisciplinar cun il num "Mesirar. Strategias per registrar il spazi". Quest caracter interdisciplinar chattan ins ussa er en l'exposiziun "La bova sco preparat".

Artistas ed artists
Mathias Balzer, Boyle Family, Florian Dombois, Naoya Hatakeyama, Andreas Renatus Högger, Schirin Kretschmann, Gereon Lepper, Esther Mathis, Matthäus Merian, Katja Schenker, Markus Schwander, Roman Signer, Robert Smithson, Daniel Spoerri, Monica Studer / Christoph van den Berg, Dominik Zehnder

Catalog
Präparat Bergsturz. tom 1, edì da Katharina Ammann e Priska Gisler, cun contribuziuns da Katharina Ammann, Flavio Anselmetti, Priska Gisler, Christoph Hoffmann, Stephan Kunz, Reinhard Wendler, museum d'art dal Grischun Cuira, scola auta d'art Berna, Lucerna/Puschlav: Edizioni Periferia, 2012, 88 paginas, 42 illustraziuns

Vernissascha: ils 24 d'avust, a las 18.00
Bainvegni: Stephan Kunz, directur dal museum d'art dal Grischun
Introducziun: Dr. Katharina Ammann, conservatura dal museum d'art dal Grischun