L'exposiziun parc naziunal è l'ultim grond omagi a l'edifizi Sulser. Durant 60 onns ha servì l'edifizi ch'è vegnì creà da l'architect Walther Sulser sco "museum d'istorgia natirala e sco museum dal parc naziunal", alura l'ha il museum d'art dal Grischun duvrà a partir da l'onn 1989 per exposiziuns temporaras. Dal 2014 fin al 2016 vegn construì en quest lieu l'engrondiment dal museum d'art dal Grischun. L'installaziun dals artists Gerda Steiner & Jörg Lenzlinger na fa betg mo endament la funcziun oriunda da l'edifizi, ella stgaffescha er plazza per chaussas novas: Il parc vegn a sa transfurmar permanentamain, ses mund da plantas e da cristals vegn a crescher ed a murir – dal di il pli lung fin il di il pli curt da l'onn.

Il pèr artistic Gerda Steiner & Jörg Lenzlinger transfurma l'edifizi Sulser dal museum d'art dal Grischun en in "parc naziunal" che n'ha anc mai existì uschia. Dal plaun sutterran fin si sut il tetg concepeschan els da nov l'edifizi: Els stiran ora chombras e construeschan ina cuntrada muntagnarda, devieschan l'aua dal tetg e construeschan auals cun quella, avran fanestras, attiran il sulegl, il vent e la plievgia en chasa, plantan differentas ervas e bostgs, carmalan tut ils animals pussaivels e preschentan collecziuns e rimnadas, en las qualas sa maschaidan ils cunfins tranter chaussas artisticas, artifizialas e natiralas.
Cun lur installaziun parc naziunal na fan Gerda Steiner & Jörg Lenzlinger betg mo endament la funcziun oriunda da l'edifizi, els stgaffeschan er plazza per chaussas novas: l'installaziun vegn
a sa transfurmar permanentamain durant ils sis mais. Il mund da las plantas e dals cristals vegn a crescher ed a murir, a flurir ed a sflurir. En il parc naziunal èn installads ierts e maletgs, patratgs ed enconuschientschas, che laschan nascher novas ideas e connexs che tradeschan tge che la natira ed il museum pudessan esser. L'exposiziun è ina funtauna d'ideas, in biotop da la fantasia, in observatori da l'art ed in ecosistem d'activitads nunspetgadas.

Il parc naziunal svizzer festivescha l'onn 2014 ses giubileum da 100 onns. L'exposiziun en il museum d'art dal Grischun lantschescha artisticamain questa occurrenza.

Gerda Steiner (1967) & Jörg Lenzlinger (1964) lavuran ensemen dapi l'onn 1997. Els èn s'acquistads in num sin plaun naziunal ed internaziunal cun installaziuns grondas, spaziusas ch'els han sviluppà per ils lieus respectivs, per exempel per l'exposiziun naziunala da la Svizra, la Expo.02 (Heimatmaschine), per la Biennala da Venezia/baselgia San Staë (Giardino calante, 2003), per la biblioteca claustrala da Son Gagl (Seelenwärmer, 2005), en il ACCA a Melbourne (water hole, 2009), en il museum Arp a Rolandseck (Hochwasser, 2011), en il Art Tower a Mito en il Giapun (power sources, 2012).

Vernissascha: venderdi, ils 21 da zercladur, a las 18.00
Bainvegni ed introducziun: Stephan Kunz, directur dal museum d'art dal Grischun, cun cooperaziun dal "Wanderchor" dal Grischun.
Apéro e buffet da Serge