Mirko Baselgia ch'è naschì l'onn 1982 tutga tar las persunas giuvnas artisticas las pli empermettentas. A chaschun da la surdada dal premi d'art Manor Cuira al deditgescha il museum d'art Cuira in'exposiziun – l'emprima exposiziun da museum da sia giuvna carriera. En sia ovra anc giuvna sa mussa Mirko Baselgia (*1982) sco in artist, dal qual la lavur è caracterisada tras ina tscherna, cumposiziun ed utilisaziun spezialmain conscienziusa da differents materials. Caracteristic per sia creaziun multifara è ch'el na sa fixescha betg sin in medium, sin ina lingua da las furmas u sin in material determinà, mabain sviluppa mintga ovra da nov. Temas ch'al interesseschan examinescha el en retschertgas voluminusas cun cumpigliar differentas persunas spezialisadas ed el collia latiers dumondas artisticas cun metodas directamain scientificas, per vegnir adina puspè tar soluziuns surprendentas. Sias lavurs sculpturalas persvadan sco ovras plasticas en il spazi ed èn simbols che reflecteschan areguard il cuntegn ed areguard la furma la relaziun dal subject cun ses ambient e che tractan dumondas da la politica sociala.
L'emprima exposiziun da museum
Per sia emprima exposiziun da museum en il museum d'art dal Grischun ha Mirko Baselgia creà ovras novas che partan per part da fatgs specifics ed architectonics da la Villa Planta neoclassicistica, en la quala sa chatta oz il museum: Uschia sa chatta sur l'entrada principala in iert da primavaira cun trais avieulers, la fanestra dal bogn anteriur vegn envaidrada da nov e per las nischas da sculpturas ch'èn oz vidas lascha Mirko Baselgia cular novas plasticas or da lava. L'exposiziun s'extenda sur plirs locals dal museum d'art e cumpiglia l'interfatscha da dadens sco er da dador.
Catalog
Davart l'exposiziun cumpara en la chasa editura Scheidegger&Spiess in catalog (tudestg / englais). Igl è l'emprima publicaziun da l'artist che dat ina survista represchentativa davart sia lavur fin ussa e che documentescha l'exposiziun actuala. In discurs tranter l'artist, Stephan Kunz e Christiane Meyer-Stoll dat plinavant invistas dal mund d'ideas e da la pratica artistica da Mirko Baselgia.
Vernissascha: Gievgia, ils 21 da mars 2013, a las 19.00
Bainvegni ed introducziun: Stephan Kunz, directur dal museum d'art dal Grischun
Surdada dal premi d'art Manor Cuira: Pierre-André Maus, commember dal cussegl administrativ da la firma Maus Frères SA, Genevra
