Bündner Kunstmuseum Chur
Museum d’art dal Grischun Cuira
Museo d’arte dei Grigioni Coira

2015

Gastspiel
Remo albert alig: athanor
in der Stadtgalerie Chur
11.12.2015 – 03.01.2016

Remo Abert Alig lavura d'in cuntin vi d'ina gronda ovra cumpletta che stat sut l'ensaina dals simbols. L'artist collia fils da veglias enconuschientschas, da tecnicas passadas e da reconuschientschas ignoradas ad ovras d'art. Questas ovras d'art han in effect simbolic a pliras vuschs. Alig ha survegnì il premi d'art da quest onn da la Somedia. Il premi è collià cun ina publicanziun che vegn preschentada en il rom da sia exposiziun en a galaria da la citad da Cuira.

Co decodescha l'uman il mund? Co fa el experientchas e co rimna el savida? Co arcunescha el quella? En tge furma po el discurrer da quai? Remo Albert Alig s'occupa da questas dumondas filosoficas e concentrescha en sias lavurs entirs faschs da maletgs e d'istorgias che dependan i da l'auter, che sa surpostan, che sa cuntradin, che sa fructifitgeschan e che sveglian en l'observatur pitschens univers pervia da tut lur illogissem. Las observaturas ed ils observaturs entran cun lur agen fund cultural e biografic en in labirint da spievels, nua che lur atgna savida sa sviluppa vinavant sa multiplitgond en moda autoreflexiva. Las ovras d'art daventan uschia in'experientscha individuala e sveglian novas enconuschientschas surprendentas. Per l'exposiziun en la galaria da la citad da Cuira ha Remo Albert Alig stgaffì aposta novas ovras.

L'exposiziun ha lieu en il rom da la surdada dal premi d'art da la Somedia. La Somedia sustegna dapi l'onn 2006 cun l'acziun "Art en la Svizra sidorientala" la lavur artistica actuala en la regiun e surdat dapi l'onn 2012 in premi d'art. La retscha da cudeschs ch'è colliada cun quai cumpara en colavuraziun cun il museum d'art dal Grischun a Cuira. Er sch'il museum d'art resta serrà anc fin il zercladur 2016 pervia da ses engrondiment, vegn mantegnida la cuntinuitad da quest instrument da promoziun prezius. Per l'artist vegn endrizzada - ultra dal premi e da la publicaziun - supplementarmain in'exposiziun en furma d'ina represchentaziun ospitanta dal museum d'art dal Grischun.

Vernissascha da l'exposiziun e dal cudesch: Gievgia, ils 10 da december 2015, a las 18.00, galaria da la citad da Cuira
Bainvegni: Stephan Kunz, directur dal museum d'art dal Grischun
Laudatio: Andrea Meuli
Surdada dal premi d'art: Andrea Masüger, CEO Somedia

Discurs cun l'artist: venderdi, ils 18 da december, a las 18.00
Remo Albert Alig discurra cun Lynn Kost (conservatur dal Museum d'art dal Grischun

Publicaziun:
Remo Albert Alig. Athanor, retscha Art en la Svizra sidorientala (4), cun ina prefaziun da Stephan Kunz e cun texts da Lynn Kost e dad Andrea Meuli, edì da Somedia Buchverlag e dal museum d'art dal Grischun, Glaruna/Cuira: somedia Buchverlag Production, 2015, 80 paginas

Museum d'art dal Grischun Bahnhofstrasse 35 CH-7000Cuira T +41 81 257 28 70 . info@bkm.gr.ch
Ma-Du 10.00 – 17.00 Gi 10.00 – 20.00