Il museum d'art dal Grischun organisescha - en collavuraziun cun la Fundaziun Capauliana e cun la Fundaziun da cultura Lumnezia - in'exposiziun en la Casa d'Angel a Lumbrein. Questa exposiziun è il punct da partenza per etablir la «Casa d'Angel» sco chasa d'art per la vallada. La collecziun da la Fundaziun Capauliana furma la basa per questa exposiziun. Duri Capaul (1923–2009) che derivava da Lumbrein ha rimnà, ensemen cun sia dunna Clara Capaul-Hunkeler (1926–2010), ina vasta collecziun da maletgs davart il Grischun. La fundaziun cumpiglia circa 300 maletgs davart la Val Lumnezia. Dal ritg fundus da dissegns, da picturas e da fotografias vegn cumpilada - ensemen cun ina pitschna tscherna d'ovras da la collecziun dal museum d'art dal Grischun - in'exposiziun che reflectscha tscherts aspects e tschertas vistas da la val. I vegnan confruntads artists impurtants sco Alois Carigiet e picturs main enconuschents, fotografias modernas dad Anna Lenz, da Thomas Popp u dad Ester Vonplon entran en in dialog cun fotografiäs istoricas, cuntradas alpinas senza persunas da Bryan Cyrial Thurston scuntran sin acquarels da Georg Peter Luck, che documenteschan la construcziun da l'ovra electrica Zervreila.

L'exposiziun dat in maletg fitg multifar da la Val Lumnezia. Ils differents aspects da questa regiun e las diversas vistas artisticas da quels furman il center da l'exposiziun en las localitads da la Casa d'Angel ch'è vegnida sanada da l'architect Peter Zumthor durant ils onns 1980.

Vernissascha: Sonda, ils 11 da fanadur 2015, 17.00, Casa d'Angel, Lumbrein
Bainvegni: Martin Cabalzar, president da la Fundaziun da cultura Lumnezia, Stephan Kunz, directur dal museum d'art dal Grischun a Cuira, e Chantal Störmer, mainagestiun da la Fundaziun Capauliana
Pled d'avertura: Duri Blumenthal, president communal da Lumnezia
Introducziun en l'exposiziun: Nicole Seeberger, assistenta scientifica, museum d'art dal Grischun a Cuira