En la collecziun dal museum retic a Cuira s chatta ina poppa-signun da la Val Calanca che vegn designada en la litteratura sco unica «sennatuntschi» realmain existenta. Il museum d'art dal Grischun deditgescha ina pitschna exposiziun a quest object misterius e porta - en il rom da sias represchentaziuns ospitantas - ovras d'art contemporan en ils locals dal museum istoric.

Adina puspè stgaffeschan umans visavis pli u main veritabels. Quai ch'è vegnì recepì pliras giadas en la mitologia ed en las ditgas, è ina materia fitg populara er en la litteratura ed en l'art figurativ. E gist sco ch'il tema da la «sennatuntschi» ha chattà access al mund dal teater e dal film, chatta el ses reflexs er en l'art contemporan. Las duas artistas da Turitg Klodin Erb ed Eliane Rutishauser sa basan sin la ditga da la «sennatuntschi» e s'avischinan a la materia cun ina forza subversiva. Lunsch davent da mintga impetus moral accentueschan las artistas en lur gruppa d'ovras multimedialas «Baby» la vart anarchica da l'istorgia e fan in gieu sulamain divertent cun noss giavischs e cun nossas temas. Il museum d'art dal Grischun ha acquistà questa lavur da pliras parts l'onn 2014 e l'avischina - en il rom d'ina represchentaziun ospitanta - directamain a la curiusa poppa-signun dal museum retic. Cun quai duai vegnir mess il focus sin in singul object dal museum istoric ed a medem temp duai vegnir preschentada ed intermediada ina nova acquisiziun dal museum d'art. Che la fantasia masculina scuntra qua sin ina perspectiva feminina, n'è betg casual, mabain vulì. La realitad legendara da la «sennatuntschi» innocenta e sula po vegnir vesida uschia en ina moda fitg cumplexa.

Vernissascha: Gievgia, ils 8 d'october 2015, a las 18.00
Bainvegni: Andrea Kauer, directura dal museum retic 
Introducziun: Silvia Conzett, manadra da project dal museum retic, Stephan Kunz, directur dal museum d'art dal Grischun