Hans Danuser è naschì l'onn 1953 a Cuira. El è in dals piuniers da la fotografia moderna en Svizra. Sin plaun internaziunal è el vegnì enconuschent cun ses ciclus IN VIVO (1980-1989). Sias ovras èn vegnidas mussadas en impurtantas exposiziuns individualas e collectivas en Svizra ed a l'exteriur. En questas exposiziuns stevan fin ussa adina en il center singulas gruppas d'ovras. L'exposiziun en il museum d'art dal Grischun a Cuira mussa l'ovra dals ultims 35 onns per l'emprima giada en ina survista. Ultra da las lavurs enconuschentas sco IN VIVO, Frozen Embryo, Strangled Body ed Erosion vegnan mussadas er lavurs dals emprims onns 1980 ch'èn sa sviluppadas a Turitg ed a New York e ch'ins n'ha anc mai vesì. Per l'emprima giada vegn er exponì il ciclus Landschaft in Bewegung/THE LAST ANALOG PHOTORAPH, vi dal qual Hans Danuser ha lavurà durant ils ultims 10 onns e tras il qual el ha manà ses experiments fotografics ad in nov punct culminant.
L'exposiziun mussa en moda impressiunanta co che Hans Danuser ha prestà ina contribuziun impurtanta per la "nova invenziun da la fotografia" sco medium artistic ed ha marcà il svilup da la fotografia fin a las pli pitschnas manevras da la fotografia analoga. El ha chapì sia lavur adina pertutgant il cuntegn ed en relaziun cun ils temas tschernids sco er sco lavur da perscrutaziun specifica per las medias. El è sa mussà sco maister ch'ha adina rendì la glisch en sias pli finas nianzas tranter ils secturs da sumbriva, tranter las zonas grischas ed ils passadis sco il tema da sias fotografias.