Cun observar fotografias sa tschenta immediatamain la dumonda, tgi e tge che nus vesain e nua ch’il maletg è vegnì fatg. Ils maletgs dad Ester Vonplon supereschan quest reflex, la finala en serias, da las qualas ils motivs èn ina natira senza umans e libra d’artefacts. Las fotografias senza orizont mussan a l’observatur naiv u sal. Ellas fan endament experiments temprivs da l’abstracziun en la fotografia e transmettan – en ina monocromia alva – ina quietezza meditativa formala e tematica.

En sias novas lavurs ha Vonplon sviluppà vinavant anc ina giada en moda consequenta l’abstracziun. Ella ha elavurà directamain las copias da contact da sias fotografias ch’ella ha fatg tranter auter en l’Arctica. Malgrà la basa da la fotografia pon ins discur-rer ussa da maletgs nunfigurativs. Tschertezzas formalas e tematicas na datti betg pli. Sumegliantamain a la pictura cun champs da colur sfunsan las observadras ed ils observaders en spazis da colur. Els pon sa fidar mo pli da lur atgna percepziun, vesair vul ussa dir scuvrir.

Il premi d’art Manor è in dals premis da promoziun ils pli impurtants da la lavur artistica contemporana en Svizra. Il premi d’art Manor Cuira è collià cun in’exposiziun individuala en il museum d’art dal Grischun e cun la publicaziun d’in cudesch.