Il fotograf Daniel Schwartz (*1955) s'occupa dapi plirs onns cun in project ch'ins pudess numnar glaziologia illustrativa. Sia lavur artistica cumpiglia pliras spartas da l'art fotografic en stil documentar. Sco fotograf examinescha Daniel Schwartz la forza da maletgs da glatschers. El consolidescha sia lavur illustrativa cun retschertgas artisticas extendidas en archivs e lavura en in stretg dialog cun la scienza. Ses maletgs mussan il glatscher sco sistem dinamic e sco archiv da l'istorgia climatica, sco lieu da regurdientscha persunal ed arcun da resursas betg illimitadas.

Daniel Schwartz ha frequentà la classa professiunala per fotografia a Turitg ed è stà ils onns 1990 2005 commember da la redacziun dal magazin cultural du. En connex cun sias vastas retschertgas fotograficas è el stà sin viadi en tut il mund. En ses project davart il glatscher è el l'emprima giada s'occupà da la Svizra. Sia lavur ha cumenzà en la Svizra Bassa caracterisada d'ina lunga istorgia glaziologica ed il Giura dal Sid, nua che Daniel Schwartz è creschì si. Tras lieus e sin vias cun connotaziuns biograficas cuntinuescha ella en il territori alpin e vegn cumplettada cun maletgs selecziunads da regiuns da glatschers en l'Asia, l'Africa e l'America dal Sid. En l'exposiziun fixeschan exempels da la pictura e la cartografia il stadi dals glatschers durant il Pitschen temp da glatsch e marcheschan lur regress ils ultims 200 onns. Il context climatologic dattan funtaunas istoricas e litteraras.

L'exposiziun cun blers maletgs impressiunants è in project che duai render attent al glatscher sco perditga da la midada dal clima, per la quala l'uman è cunresponsabel. Il project sclerescha la relaziun tranter il glatscher e l'uman e metta en relaziun il temp geologic resp. glazial cun il temp uman individual per gidar a chapir ils process da la stgaudada globala.