En il cabinet da la Villa Planta istorica vegnan messas en il center ovras sin palpiri d’artistas e d’artists grischuns sut il titel «Fokus GRafik». Il Museum d’art dal Grischun posseda in’impurtanta collecziun d’ovras graficas grischunas. Tranter quellas figureschan ovras remartgablas da la famusa famiglia da la Bregaglia cun Giovanni Giacometti e ses figl Alberto sco er il parent dalunsch Augusto Giacometti. La collecziun grafica cumpiglia numerusas gruppas d’ovras dad Andreas Walser, da Leonhard Meisser e d’Anny Meisser-Vonzun, dad Alois Carigiet e da Lenz Klotz. En pli sa chattan praticamain tut las ovras graficas da Matias Spescha e da Matthias Balzer en il Museum d’art dal Grischun. La lavur contemporana sin palpiri è egualmain represchentada e documentada bain cun ovras d'Evelina Cajacob, da Corsin Fontana, da Zilla Leutenegger, da Gaspare Melcher, da Not Vital e da Thomas Zindel. Questa preschentaziun da la collecziun n’offra betg sulettamain ina survista da l’art grafic dal Grischun a partir dal 1900, mabain avra er cun ovras elegidas novas perspectivas e dialogs che schlargian il concept classic da la grafica.