En il Museum d'art dal Grischun realisescha l'artist lituan Augustas Serapinas (*1990) ina nova installaziun specifica per il museum. Il punct da partenza da questa installaziun è ina chasa da bogn istorica a Vilnius. Gia l'onn 2021 ha l'artist prendì dapart questa chasa da lain bandunada e l'ha puspè mess ensemen en in nov lieu en la Lituania. Per in'exposiziun en Ollanda ha el lura transfurmà la chasa l'onn 2022 en in pavigliun da té. En in proxim pass ha Serapinas ars la laina da la chasa, per producir quadrels da savun e da cement or da la tschendra. En noss locals creescha el la finala, or da quests tschients quadrels, ina sculptura che represchenta ina chaltgera impressiunanta e ch'el installescha sin il palantschieu oriund da questa chasa da bogn. En ils egls da Serapinas èn chasas bandunadas – ch'i dat er en il Grischun – monuments vivs. Ellas raquintan da la migraziun e da la tschertga d'ina meglra vita. Cuntrari a monuments tradiziunals che vegnan construids sin auts piedestals, na vegnan quests edifizis dentant per il solit betg remartgads. Serapinas drizza l'egliada sin il patrimoni cultural invisibel, cun preschentar las tradiziuns popularas sco insatge che sa lascha furmar e transfurmar.