L'exposiziun da giubileum «Davent da qua» metta il focus sin la collecziun dal Museum d'art dal Grischun, mussa particularitads specificas e sviluppa perspectivas per l'avegnir.
L'onn 1900 ha l'Uniun grischuna d'art cumenzà ed endrizzar ina collecziun d'art. La collecziun cumpiglia en il fratemp circa 8000 lavurs da tut ils geners da l'art figurativ dal 18. tschientaner fin oz e reflectescha la diversitad mediala da la lavur artistica. Dapi sia fundaziun è la collecziun dal Museum d'art dal Grischun sa sviluppada or da la situaziun culturala specifica dal Grischun: Latiers tutgan la caracterisaziun tras la cuntrada alpina u er l'alternanza tranter emigraziun e turissem. Artistas ed artists vegnan e van, mainan las particularitads ora en il mund e portan il mund en il Grischun. L'istorgia da l'art en il Grischun è caracterisada da differentas figuras e da divers moviments, che han procurà per accents spezials en la collecziun. L'intenziun è da procurar che la collecziun creschida istoricamain restia independenta ed incumparabla. Las prioritads existentas duain perquai vegnir tgiradas e cumplettadas, ed i duain vegnir mess novs accents.
L'exposiziun da giubileum «Davent da qua» s'extenda sur l'entir museum cun tuttas duas chasas (Villa Planta e tract nov). En il focus na stattan betg mo ils puncts culminants da la collecziun, mabain er las acquisiziuns dals ultims onns, che han gidà ad extender il profil da la collecziun. In'attenziun speziala dat l'exposiziun a las perspectivas per l'avegnir: «Davent da qua» na stat betg mo per las ragischs localas, mabain vul er mussar, en tge direcziun che la collecziun dal museum sa lascha amplifitgar. Aposta per quest intent vegnan dumandads emprests e surdadas incumbensas per ovras.