L'occupaziun cun il medium da la fotografia è daventada fitg impurtanta en il Grischun a partir da la mesadad dal 19avel tschientaner, en spezial pervia dal turissem ch'è sa sviluppà. In emprim punct culminant ha la fotografia cuntanschì il cumenzament dal 20avel tschientaner, cura che differentas fotografas e differents fotografs dal Grischun èn s'engaschads sco interpretas ed interprets da la cuntrada, savens sin basa da la pictura da Ferdinand Hodler u da Giovanni Segantini, ed han stgaffì maletgs da souvenir cun ambiziuns artisticas.

Sco emprim sto vegnir numnà en quest connex Albert Steiner, dal qual il museum d'art dal Grischun dispona d'ina gruppa d'ovras cumplessiva. In'ulteriura part impurtanta da la collecziun è l'ovra da l'artist fotograf bregagliot Andrea Garbald che datescha medemamain da quel temp.

Sco lieu cun tradiziun e cun la fotografia sco medium artistic impurtant vegni dà in'attenziun speziala a las artistas ed als artists contemporans: Gaudenz Signorell, Guido Baselgia, Hans Danuser, Katharina Vonow, Jules Spinatsch, Florio Puenter, Andrea Good u Ester Vonplon èn represchentads en la collecziun cun grondas gruppas d'ovras.

Link Website FOTOSZENE GR