La Photobastei è ina chasa auta en il center da Turitg che vegn duvrada temporar¬main, fin la fin d'avust 2014, per la fotografia. Sin set plauns porscha ella plazza per differentas exposiziuns. Il museum d'art dal Grischun preschenta en la Photobastei il project Foto Szene Grischun.
Il project Foto Szene Grischun, ch'il museum d'art dal Grischun ha inizià l'onn 2010, reflectescha la ritga ovra fotografica en e dal Grischun ed è vegnì concepì sco instrument da retschertga a pli lunga vista che sa cumpona d'ina pagina d'internet, d'exposiziuns, d'occur¬renzas e da publicaziuns. Er las activitads da collecziun correspundentas dal museum d'art gidan ad etablir il Grischun sco lieu attractiv per sa fatschentar cun la fotografia. Cun l'expo¬siziun en la Photobastei preschenta il museum d'art dal Grischun il project Foto Szene Grischun.
Il Grischun dispona d'ina ritga ovra fotografica che ha sias ragischs istoricas en la propaga¬ziun turistica da la bellezza da las cuntradas. Las fotografas ed ils fotografs dad oz na sa concentreschan dentant daditg betg pli sin maletgs da muntognas intactas, er sch'il chantun turistic Grischun vegn anc adina percepì en questa moda. En ils maletgs vegn questa regiun culturala particulara tractada en moda fitg vasta. Quai tanscha dals studis da la natira nun¬usitads da Guido Baselgia sur las fotografias spectacularas da la cuntrada da Nicola Pitaro e d'Arno Hassler fin ad observaziuns precisas da l'utilisaziun agricula u turistica dal pajais (Gerber/Bardill, Jules Spinatsch). Represchentadas èn er posiziuns che tractan il medium "fotografia" en moda experimentala sco Gaudenz Signorell, Dominique Teufen u Ester Vonplon e che cuntanschan in aut grad d'abstracziun (Hans Danuser, Bianca Brunner). La particularitad da questa exposiziun è quella ch'ella mussa la dimensiun dal medium foto¬grafic, mettend l'accent plitgunsch sin il sectur artistic e main sin il sectur applitgà. Che la fotografia grischuna contemporana surpassa permanentamain ils cunfins da l'atgna regiun e dals agens temas, sa chapescha da sez. En quest spazi cultural èsi tradiziunalmain ina caracteristica profunda da "sgular ora", ed en noss temp globalisà survegn questa caracte¬ristica ina nova dimensiun. En la retscha conceptuala da Stephan Schenk visitan ins per exempel ils panoramas da chombras d'hotel da l'entir mund, entant che Kurt Caviezel rimna tar sai a chasa maletgs da webcams da tut il mund.
Cun l'exposiziun Foto Szene Grischun en la Photobastei preschenta il museum d'art dal Grischun il project sin la plattafurma d'internet www.fotoszene.gr.ch ed ina schelta da fotografas e da fotografs: Andrea Badrutt / Guido Baselgia / Bianca Brunner / Kurt Caviezel / Hans Danuser / Gabriela Gerber e Lukas Bardill / Arno Hassler / Gian Paul Lozza / Nicola Pitaro / Florio Puenter / Stephan Schenk / Gaudenz Signorell / Jules Spinatsch / Dominique Teufen / Ester Vonplon
Avertura: gievgia, ils 17 d'avrigl, a las 19.00
Bainvegni ed introducziun: Dr. Katharina Ammann, Conservatura dal museum d'art dal Grischun
