Andreas Walser (1908 – 1930) è ina persunalitad extraordinaria en il mund grischun da l'art e da la cultura. El è vegnì taschentà durant blers decennis.
Creschì si sco figl d'in reverenda en la citad veglia da Cuira, è el emigrà cun 20 onns en la metropola d'art Paris. Tenor sias atgnas indicaziuns vuleva el "daventar dal tuttafatg Franzos". A Paris ha el chattà svelt contact, ha emprendì d'enconuscher Pablo Picasso, Jean Cocteau, Klaus Mann, René Crevel, Maurice Tabard, Colette ed autras persunalitads da la scena d'art e da litteratura. El ha lavurà sco in nar ed ha prest pudì mussar ed er vender intginas ovras en exposiziuns. E tuttina turnava el adina puspè en il Grischun, tar ses amis da giuventetgna e tar ses ami patern ed exemplaric Ernst Ludwig Kirchner.
L'exposiziun ch'è vegnida concepida ensemen cun la musicista Vera Kappeler vuless mussar novs access a quest artist da Cuira. En il laboratori dal museum, noss forum per performance, intermediaziun, participaziun e discussiun, endrizzain nus quest project interdisciplinar.