Heiner Kielholz (*1942) è in grond nunenconuschent en l'art svizzer. Enturn l'onn 1970 fascheva el part da la nova avantgarda svizra ed ha exponì sin plaun internaziunal. Suenter è el sa retratg quasi dal tuttafatg, è viagià blers onns senza domicil fix ed ha sviluppà in'ovra ch'era nutrida da las experientschas dals lieus ch'el ha visità. Sia ovra vegniva purtada d'ina tenuta artistica che sondescha la ritgezza da quai, che circumdescha sia persuna e che caracterisescha sia vita. Dapi l'onn 1992 viva e lavura Heiner Kielholz en il Puschlav ed en la Valtellina. El lavura cuntinuadamain vi d'ina ovra quieta, per il solit en pitschens formats. Cunzunt da las artistas e dals artists vegn el apprezià fermamain. En differents museums d'art da la Svizra è el represchentà cun ovras impurtantas. Sias exposiziuns èn raras, ma vegnan adina percepidas fitg bain. Entant che sias ultimas grondas exposiziuns han tractà quasi l'entir spectrum da ses temas, sa concentrescha l'exposiziun en il Museum d'art dal Grischun sin ils interiurs e sin las natiras mortas caracteristicas, ch'el ha stgaffì ils ultims 15 onns. Els furneschan in maletg unic da sia egliada speziala sin il mund. Savens vegnan tratgas parallelas tranter Heiner Kielholz ed il scriptur Robert Walser. Cun Walser parta Kielholz l'amur per las chaussas discretas, quotidianas da la vita.